திருமணத்திற்கு இன்னும் 5 நாட்களே இருக்கும் நிலையில் நடிகர் சர்வானந்த் கார் விபத்தில் சிக்கிய செய்தி அதிர்ச்சியை ஏற்படுத்தியுள்ளது.
திருமணம்
தெலுங்கில் முன்னணி நடிகராக இருக்கக்கூடிய சர்வானந்த், 2004 ஆம் ஆண்டு சினிமாவில் அறிமுகமானார். தமிழில் 2009 ஆம் ஆண்டு வெளியான ‘நாளை நமதே’ என்ற திரைப்படத்தில் நடித்திருந்தார். அதன்பிறகு எங்கேயும் எப்போதும், ஜேகே என்னும் நண்பனின் வாழ்க்கை உள்ளிட்ட சில படங்களில் நடித்திருந்தார். சர்வானந்த்துக்கும் சாப்ட்வேர் இன்ஜினியர் ரக்ஷிதா ரெட்டி என்பவருக்கும் ஜனவரி மாதம் 26 ஆம் தேதி திருமண நிச்சயதார்த்தம் நடைபெற்றது. ஜெய்ப்பூரில் உள்ள லீலா பேலஸில் அடுத்த மாதம் அதாவது ஜூன் மூன்றாம் தேதி இவர்களுக்கு திருமணம் நடக்கப் போவதாக தெரிவிக்கப்பட்டது. இந்த அறிவிப்பு மூலம் இவர்களது திருமண வதந்திக்கு முற்றுப்புள்ளி வைக்கப்பட்டது.
கார் விபத்து
இந்த நிலையில், ஹைதராபாத்தில் உள்ள ஃபிலிம் நகர் ஜங்சன் அருகே வந்தபோது சர்வானந்த்தின் கார் கட்டுப்பாட்டை இழந்து சாலை ஓரத்தில் கவிழ்ந்து விபத்துக்குள்ளாகி உள்ளது. இதில் சர்வானந்த்திற்கு லேசான காயமே ஏற்பட்டிருக்கிறது. உடனடியாக அருகில் இருந்தவர்கள் அவரை மீட்டு தனியார் மருத்துவமனையில் அனுமதித்திருக்கின்றனர். திருமணத்துக்கு 5 நாட்களே உள்ள நிலையில் நடிகர் சர்வானந்த்தின் கார் விபத்துக்குள்ளானது ரசிகர்களிடையே அதிர்ச்சியை ஏற்படுத்தியுள்ளது.
