ரஜினி, கமல் உட்பட பல பிரபலங்களின் திரைப்படங்களை இயக்கிய இயக்குநர் சுரேஷ் கிருஷ்ணாவின் அடுத்தப் படத்தில் மிர்ச்சி சிவா நடிக்க உள்ளதாக தகவல் வெளியாகியுள்ளது.
நகைச்சுவை நாயகன்
ஆர்.ஜே.வாக ரேடியோவில் பணியாற்றிய சிவா, ‘சென்னை 28’ திரைப்படம் மூலம் ஹீரோவாக அறிமுகமானார். இவர் நடித்த ‘தமிழ்படம்’ என்ற திரைப்படம் மிகப்பெரிய பிளாக் பூஸ்டர் படமாக அமைந்தது. இதற்குப்பின் சென்னை 28, தமிழ்படம், கலகலப்பு போன்ற படங்களின் இரண்டாம் பாகங்கள், யா யா, வணக்கம் சென்னை என தொடர்ந்து ரசிகர்களை மகிழ்விக்கும் வகையிலான கதைகளில் நடித்தார். சிவா தற்போது ‘சுமோ’ படத்தில் நடித்து முடித்துள்ளார். இப்படம் ரிலீசுக்கு தயாராகி வருகிறது.
வெற்றி இயக்குநர்
சூப்பர் ஸ்டார் ரஜினிகாந்த் நடிப்பில் வெளியாகி சூப்பர் டூப்பர் ஹிட்டான ’பாட்ஷா’ திரைப்படத்தை இயக்கியவர் சுரேஷ் கிருஷ்ணா. இவர் ஆளவந்தான், சங்கமம், அண்ணாமலை, சத்யா உள்பட பல வெற்றித் திரைப்படங்களை இயக்கியுள்ளார். கடைசியாக ‘இளைஞன்’ என்ற படத்தை இயக்கிய சுரேஷ் கிருஷ்ணா, 9 ஆண்டுகளுக்குப் பிறகு தற்போது ஒரு புதிய படத்தை இயக்க உள்ளார். அந்தப் படத்தில் மிர்ச்சி சிவா கதாநாயகனாக நடிக்க இருப்பதாக கூறப்படுகிறது. முழுக்க முழுக்க காமெடி மற்றும் சென்டிமென்ட் கலந்த படமாக உருவாக இருக்கும் அப்படம் குறித்த அதிகாரப்பூர்வ அறிவிப்பு, விரைவில் வெளிவரும் என்று எதிர்பார்க்கப்படுகிறது.
