நடிகர் சரத் பாபு மிகவும் கவலைக்கிடமாக இருப்பதால் அவருக்கு செயற்கை சுவாசக்கருவி பொருத்தப்பட்டு சிகிச்சை அளிக்கப்பட்டு வருகிறது.
ரஜினியின் நண்பர்
1973 ஆம் ஆண்டு ராம ராஜ்ஜியம் என்ற தெலுங்கு படத்தின் மூலம் சினிமா துறையில் அறிமுகமான நடிகர் சரத்பாபு, 1977 ஆம் ஆண்டு பட்டினப்பிரவேசம் என்ற தமிழ் படத்தின் மூலம் தமிழ் திரையுலகிற்கு அறிமுகம் ஆனார். அதன்பிறகு நிழல் நிஜமாகிறது, வட்டத்துக்குள் சதுரம், உயிர் உள்ளவரை, முள்ளும் மலரும், முடிசூடா மன்னன் உள்ளிட்ட பல ஹிட் படங்களை கொடுத்தார். 70களில் தனது திரைப்பயணத்தை துவங்கிய சரத் பாபு, ஆரம்ப கட்டத்தில் ஹீரோவாக நடித்திருந்தாலும், அதன்பிறகு குணச்சித்திர கதாபாத்திரத்தில் நடித்து ரசிகர்கள் மனதில் நீங்காத இடத்தை பிடித்தார். பல முன்னணி நடிகர்களுடன் இணைந்து நடித்த சரத்பாபு, முத்து, அண்ணாமலை உள்ளிட்ட படங்களில் நடித்ததன் மூலம் ரசிகர்கள் மனதில் நீங்காத இடத்தை பிடித்தார். ஆளவந்தான், புதிய கீதை, பேரரசு, கள்வனின் காதலி என்று இவரது நடிப்பில் வெளிவந்த ஹிட் படங்கள் ஏராளம். சமீபத்தில் வெளியான வசந்த முல்லை என்ற படத்தில் டாக்டராக நடித்திருந்தார் சரத்பாபு. பாபி சிம்ஹா இந்த படத்தில் ஹீரோவாக நடித்திருந்தார். 
தீவிர சிகிச்சை
நடிகர் சரத்பாபு 1974 ஆம் ஆண்டு ரமா பிரபா என்பவரை திருமணம் செய்து கொண்டார். அவர் தெலுங்கு மற்றும் தமிழ் படங்களில் நடித்து பிரபலமானவர். பிறகு கருத்து வேறுபாடு காரணமாக 1988 ஆம் ஆண்டு இருவரும் விவாகரத்து பெற்றனர். அதன்பின் 1990 ஆம் ஆண்டு சினேகா நம்பியார் என்பவரை திருமணம் செய்துகொண்ட சரத் பாபு, மீண்டும் 2011 ஆம் ஆண்டு விவாகரத்து பெற்றார். தற்போது 71 வயதாகும் நடிகர் சரத்பாபு, ஹைதராபாத்தில் இருக்கும் தனது வீட்டில் வசித்து வந்தார். இந்நிலையில் திடீரென உடல்நலக்குறைவு ஏற்பட்டதால் மருத்துவமனையில் அனுமதிக்கப்பட்டார். அங்கு அவருக்கு செயற்கை சுவாசக்கருவி பொருத்தப்பட்டு சிகிச்சை அளிக்கப்பட்டு வருகிறது. இருப்பினும் அவர் உடல்நிலை கவலைக்கிடமாக இருப்பதாகக் கூறப்படுகிறது. அவர் விரைவில் நலம் பெற சினிமா பிரபலங்களும், ரசிகர்களும் பிரார்த்தனை செய்து வருகின்றனர்.
