சிவகார்த்திகேயன் நடித்து வரும் மாவீரன் படத்தின் முதல் பாடலான சீன் ஆ.. சீன் ஆ.. பாட்டின் நடன குழுவினர்கள், படக்குழுவினருக்கு நன்றி தெரிவித்துள்ளனர்.
நல்ல வரவேற்பு
சிவகார்த்திகேயன் நடித்து வரும் மாவீரன் திரைப்படத்தின் முதல் பாடலான “சீன் ஆ.. சீன் ஆ..” பாடல், சமீபத்தில் வெளியானது. மாவீரன் படத்தை இயக்குகிறார் மடோன் அஸ்வின். ஏற்கனவே இவர் இயக்கிய மண்டேலா திரைப்படம் ரசிகர்கள் மத்தியில் நல்ல வரவேற்பை பெற்றது. மாவீரன் படத்தின் படப்பிடிப்பு விறுவிறுப்பாக சென்னையில் நடந்து கொண்டிருக்கின்றது. மண்டேலா படத்திற்கு இசையமைத்த பரத் சங்கர் இந்த படத்திற்கும் இசையமைக்கிறார். இவரது இசையில் முதன் முதலில் சிவகார்த்திகேயன் நடிக்கிறார். சமீப காலமாக இந்த பாடல் மீது மிகுந்த ஆர்வம் நிலவி வந்த நிலையில், தற்போது நல்ல வரவேற்பை பெற்று வருகிறது. கோடை விடுமுறையில் இந்த படம் வெளிவர இருப்பதாக தகவல் வெளிவந்துள்ளது.
நன்றி கூறிய கலைஞர்கள்
சிவகார்த்திகேயன் நடிப்பில் வெளியான சில படங்கள் வரவேற்பை பெறாத நிலையில், மாவீரன் திரைப்படம் மீது ரசிகர்கள் அதிக ஆர்வம் காட்டி வருகின்றனர். சமீபத்தில் வெளியான மாவீரன் படத்தின் சீன் ஆ.. சீன் ஆ பாடலை அனிருத் பாடியுள்ளார். இந்தப் பாடலில் 500-க்கும் மேற்பட்ட உள்ளூர் நடனக் கலைஞர்கள் பங்கேற்றுள்ளனர். இதற்காக, நடன கலைஞர்கள் சங்கம் பாராட்டுத் தெரிவித்துள்ளது. நடன கலைஞர்கள் சங்க உறுப்பினர்கள் சின்னி பிரகாஷ், பாபு, மாரி ஆகியோர் நடிகர் சிவகார்த்திகேயன், இயக்குநர் மடோன் அஷ்வின், தயாரிப்பாளர் அருண் விஸ்வா ஆகியோரைப் பாராட்டியுள்ளனர். இந்த படத்தில் அதிதி ஷங்கர் சிவகார்த்திகேயனுக்கு ஜோடியாக நடித்துள்ளார் என்பது குறிப்பிடத்தக்கது. மேலும் சிவகார்த்திகேயன் நடிப்பில் அடுத்தடுத்து படங்கள் வெளிவர தயாராக உள்ளது.
