சூப்பர் ஸ்டார் ரஜினிகாந்த் நடிப்பில் உருவாகி வெற்றிப்படமாக அமைந்த ‘மனிதன்’ திரைப்படம் 38 ஆண்டுகள் கழித்து ரி ரிலீஸாகிறது.
ரி ரிலீஸ்
சமீபகாலமாக பழைய படங்களின் ரி ரிலீஸ் அதிகளவில் நடந்து வருகிறது. புதுப்படங்களின் வரவேற்புக் குறைவாக உள்ள நிலையில் சென்னையின் பிரபல திரையரங்குகள் இதுபோல பழைய படங்களை ரி ரிலீஸ் செய்கின்றனர். ரசிகர்கள் மத்தியில் பழைய படங்களுக்கு நல்ல வரவேற்பைக் கொடுத்து வருகின்றனர் என்பதே அதிக படங்கள் ரி ரிலீஸ் ஆகக் காரணமாக இருக்கிறது.
வரவேற்பு
சமீபத்தில் ஆளவந்தான், வேட்டையாடு விளையாடு, புதுப்பேட்டை, ஆயிரத்தில் ஒருவன், வாலி, கேப்டன் பிரபாகரன் ஆகிய திரைப்படங்கள் ரி ரிலீஸ் செய்யப்பட்டு எதிர்பார்த்ததை விட அதிகமான வரவேற்பை பெற்றன. இவற்றில் உச்சமாக விஜய்யின் கில்லி திரைப்படம் ரி ரிலீஸில் ரூ.20 கோடிக்கு மேல் வசூலித்து சாதனை படைத்தது. 
எதிர்பார்ப்பு
அந்த வரிசையில் ரஜினிகாந்த் நடிப்பில் 1987 ஆம் ஆண்டு வெளியான ‘மனிதன்’ திரைப்படம் தற்போது ரி ரிலீஸ் ஆக உள்ளது. ஏவிஎம் தயாரிப்பில் எஸ்.பி. முத்துராமன் இயக்கத்தில் உருவான ‘மனிதன்’ திரைப்படம் அப்போது வெற்றிப்படமாக அமைந்தது. தற்போது ரஜினிகாந்த் திரைவாழ்க்கையில் 50 ஆண்டுகளைக் கடந்துள்ள நிலையில், அக்டோபர் 10 ஆம் தேதி இந்த படத்தை குரு ராஜா இண்டர்நேஷனல்ஸ் நிறுவனம் வெளியிடுகிறது.
