கன்னடத்து பைங்கிளி என்று தமிழக ரசிகர்களால் போற்றி புகழப்பட்ட நடிகை சரோஜா தேவி இன்று இயற்கை எய்தினார்.
பழம்பெரும் நடிகை
கர்நாடக மாநிலத்தைச் சேர்ந்தவர் நடிகை சரோஜாதேவி. இவரது இயற்பெயர் ராதா தேவி கவுடா. 1938 ஆம் ஆண்டு ஜனவரி மாதம் 7 ஆம் தேதி பிறந்தார். 1955 ஆம் ஆண்டு முதல் திரைப்படங்களில் நடித்து வந்தார். எம்.ஜி.ஆர், சிவாஜி உள்ளிட்ட முன்னணி நடிகர்களுடன் அவர் இணைந்து நடித்துள்ளார். ‘அன்பே வா’ திரைப்படத்தில் எம்.ஜி.ஆருடன் அவர் இணைந்து ஆடிய ‘லவ் பேர்ட்ஸ், லவ் பேர்ட்ஸ்’ என்ற பாடல் சரோஜா தேவிக்கு மிகப்பெரிய வரவேற்பை பெற்று தந்தது. தமிழ், தெலுங்கு, கன்னடம் மற்றும் ஹிந்தி ஆகிய மொழிகளில் 200க்கும் மேற்பட்ட திரைப்படங்களுக்கு மேல் அவர் நடித்துள்ளார். 
ரசிகர்கள் அதிர்ச்சி
தமிழக ரசிகர்களால் கன்னடத்து பைங்கிளி, அபிநய சரஸ்வதி என அன்போடு அழைக்கப்பட்ட நடிகை சரோஜா தேவி, சிறந்த நடிப்பிற்காக பத்ம பூஷன், பத்ம ஸ்ரீ விருதுகளையும் பெற்றுள்ளார். இவர் நான்கு தலைமுறைகளை கண்ட ஒரே நடிகையும் ஆவர். உடல் நலக்குறைவு காரணமாக இன்று காலை சரோஜா தேவி இயற்கை எய்தினார். அவருக்கு வயது 87. நடிகை சரோஜா தேவியின் மறைவு செய்தியை கேட்டு திரைப்படத்துறையினர் மற்றும் ரசிகர்கள் அதிர்ச்சியில் உள்ளனர்.
