விஜய் டிவியின் மிகவும் எதிர்பார்க்கப்பட்ட சூப்பர் சிங்கர் ஜூனியர் நிகழ்ச்சி தனது 10வது சீசனுடன் ஒளிபரப்பாகவுள்ளது.
ஜொலிக்கும் நட்சத்திரங்கள்
தமிழின் முன்னணி தொலைக்காட்சியான விஜய் டிவியில், பல வருடங்களாக வெற்றிநடை போட்டு வருகிறது சூப்பர் சிங்கர் நிகழ்ச்சி. தமிழ் இசை உலகில் மிகப்பெரும் மாற்றத்தை ஏற்படுத்தி வரும் இந்த நிகழ்ச்சி, தற்போது புத்தம் புதிய சீசனை தொடங்க உள்ளது. 2006 ஆம் ஆண்டு தொடங்கப்பட்ட நாள் முதல் சூப்பர் சிங்கர் நிகழ்ச்சி மக்களிடையே எப்போதுமே சிறந்ததாகவே இருந்து வருகிறது. பல வெற்றிகரமான சீசன்களுக்குப் பிறகு, இந்த பிரம்மாண்ட மேடையில் தங்கள் திறமைகளை வெளிப்படுத்த இளம் பாடும் திறமைவாய்ந்தவர்கள் தேர்ந்தெடுக்கப்பட்டு அவர்கள் இந்த மேடையில் பாடும் வாய்ப்பை விஜய் டிவி வழங்கி வருகிறது. போட்டியாளர்களாக பங்கேற்றவர்களுக்கு உரிய அங்கீகாரமும், பிரபல அந்தஸ்தையும் இந்த நிகழ்ச்சி வழங்கியுள்ளது. சூப்பர் சிங்கர் நிகழ்ச்சியில் போட்டியிட்ட சூப்பர் சிங்கர் திறமைகள் திரையுலகில் முன்னணி பின்னணிப் பாடகர்களாகவும், உலகெங்கிலும் உள்ள பல நிகழ்வுகளிலும் பங்கேற்று நட்சத்திரங்களாக ஜொலிக்கின்றனர்.
வெற்றியாளர்கள்
2006 ஆம் ஆண்டு முதல் சூப்பர் சிங்கர் ஜூனியர் நிகழ்ச்சி சிறுவர்களின் திறமைகளை வெளிப்படுத்தும் அரிய வாய்ப்பாக திகழ்ந்து வருகிறது. கிருஷ்ணமூர்த்தி, அல்கா அஜித், ஆஜீத், ஸ்பூர்த்தி, ப்ரிதிகா, ஹ்ரிதிக், கிரிஷாங் மற்றும் ஸ்ரீநிஷா போன்ற முன்னாள் வெற்றி பெற்ற பங்கேற்பாளர்கள் இன்று புகழ்பெற்ற பின்னணி பாடகர்களாக திரையுலகில் பிரகாசிக்கின்றனர். தங்கள் திறமையை உலகிற்கு அறிமுகப்படுத்திய இந்த மேடையில், பிரபல இசையமைப்பாளர்கள் ஏ.ஆர். ரகுமான், அனிருத், ஹாரிஸ் ஜெயராஜ் ஆகியோருடன் பணிபுரியும் வாய்ப்பும் கொடுத்துள்ளது.
சீசன் 10
இந்த பாடும் திறமைக்கான சூப்பர் சிங்கர் சீசன் 10 நிகழ்ச்சி நவ.,16 ஆம் தேதி முதல் ஒவ்வொரு சனி மற்றும் ஞாயிற்றுக்கிழமைகளிலும் மாலை 6.30 மணிக்கு விஜய் டிவியில் ஒளிபரப்பாகிறது. 6 முதல் 15 வயதுக்குட்பட்ட குழந்தைகள் தங்களது பாடல் திறமைகளை வெளிப்படுத்தும் மேடையாகத் திகழும் சூப்பர் சிங்கர் ஜூனியர் இப்போது 10வது சீசனுடன் மீண்டும் மக்களின் மனதில் கொண்டிருக்கும் உற்சாகத்தை மெருகூட்ட வருகிறது. தமிழகத்தின் பல்வேறு பகுதிகளில் நடத்தப்பட்ட தேர்வில் திறமைசாலிகள் பங்கேற்று பல நிலைகளில் தேர்வு செய்யப்பட்டுள்ளனர். முதல்முறையாக இசை மேதை டி.இமான் ஜூனியர் சீசன் 10ல் இணைந்து கே.எஸ். சித்ரா மற்றும் மனோவுடன் பாடகர்களுக்கு வழிகாட்டும் நடுவர்களில் இணைந்துள்ளார். ம கா பா ஆனந்த் மற்றும் பிரியங்கா தேஷ்பாண்டே ஆகியோர் இந்த நிகழ்ச்சியை தொகுத்து வழங்குகின்றனர். இந்த புதிய சீசனில், நிகழ்ச்சியின் மிக பிரமாண்டமான மேடையில், சிறந்த பாடும் திறமையாளர்கள் அனைவரும் ஜொலிக்க உள்ளனர். இதனை முன்னிட்டு வெளியிடப்பட்டுள்ள சூப்பர் சிங்கர் ஜூனியர் 10 ப்ரோமோக்கள் ரசிகர்கள் மத்தியில் மிகுந்த வரவேற்பைப் பெற்றிருக்கிறது. ஒவ்வொரு ப்ரோமோவும், ‘ஒவ்வொரு குரலும் ஒரு கதை சொல்லும்! என்ற வரிகளை உள்ளடக்கியது. இதன்மூலம் இதற்கான எதிர்பார்ப்பை அதிகரிக்கிறது. மேலும் நவம்பர் 16 ஆம் முதல், சனி மற்றும் ஞாயிறுதோறும் மாலை 6.30 மணிக்கு விஜய் டிவியில் ஒளிபரப்பாகும் சூப்பர் சிங்கர் சீசன் 10 நிகழ்ச்சியை கண்டுகளிக்கத் தவறாதீர்கள்!
